Sana’y di mag-maliw……

“Sana’y di mag-maliw ang awit ni inang mahal..”

Napakaganda ng isang awiting tagalog, para sa mga ina. Nalalapit na naman ang Araw ng mga Dakilang Babae sa Mundo. Kahit matagal na pumanaw ang aming Ina walang araw na di s’ya  sumagi sa aking isip,  bagama’t di kami lumaki sa kanya. Bata pa lang kami ng magkahiwalay sila ng aking ama kaya’t lumaki kami sa piling ng aking lola at dalawang tiyahin.

Hindi man kami nagkasama na aking Ina ng mahabang panahon, di man kami madalas magkita nuong nabubuhay pa s’ya, gumawa ang panginoon ng paraan upang sa mga huling sandali ng kanyang buhay dito sa mundo ay mapagsilbihan pa namin siya. Nagkaroon kami ng pagkakataon ng maipadama namin ang pagmamahal at pag mamalasakit sa aming ina. Duon naramdaman ko na kahit di mo pala siya nakasama ng mahabang panahon may kung anung damdamin ang maguugnay sa inyong dalawa at malilimutan mo ang lahat ng nakaraan. Hindi mo mararamdaman na matagal kayong hindi nagkasama, nalala ko pa nuong magkasarilinan kami ng aking Ina. Panay ang hingi nya ng tawad dahil sa naging mahina daw ‘sya nuong panahon  na magulo ang relasyon nila ng aking ama na nauwe sa hiwalayan. “Wala na iyon” ang tanging sagot ko , napalaki naman kami ng maayos. Siguro kung nuong mga panahon na hindi pa ganuon kalawak ang aking pag iisip baka iba ang naisagot ko sa kanya.

Ang pagging Ina ay di mo talaga masusukat at hindi kailanman sinusukat. Kahit nga hindi mo tunay na ina, at di ka n’ya dinala sa kanyang sinapupunan mararamdaman mo na naroon ang pagmamahal , pagkalinga at ang pagturing sa’yo bilang anak .

Minsan, may pinayuhan ako na kaibigan na umuwi sya sa kanila sa Batangas at dalawin nya ang kanyang Ina. Alam nya na nagtatampo na ang kanyang Ina ngunit di pa rin nya ito pinupuntahan. Ngayon na  magtatapos s’ya sa kolehiyo ay ayaw s’yang puntahan ng kanyang Ina. Ang sabi ko nga dapat sya mismo ang magsabi na sya ang dadalo sa kanyang pagtatapos at iaalay nya ang kanyang diploma sa kanyang ina. Sinabi ko sa kanya na hanggat nariyan ang kanyang Ina, mahalin at bigyan ito ng pansin, huwag ng hayaan dumating sa panahon na sisihin pa natin ang ating sarili sa mga pagkululang natin sa ating Ina.

Kaya sa mga makakabasa nito, kailan nyo huling nakusap o nakamusta at nakasama man lamang ang inyong ina? hindi ba nagmamaliw ang inyong pagmamahal sa inyong ina?

Advertisements